L'autu jornu camminavo sulu sulu intu Furmucuso e
penzavo ncapo a me, chi sa quanta gente ha fatto campà questa
terra, quantu grano, quant'avena, quant'uoriscio, quantu
granurinio.
Io me re recordo re mascese re Furmucuso, li ciciri, re nmiccole, re cucozze e re traiene, li carri cu li uovi, li
muli, li ciucci, re criature 'mmiezzo a la varda cu re sarme
re re gregne.
Quanti viaggi hanno fatto ste traiene, m'addummannavo 'ncapo a
me, sti carri, sti ciucci; quanti ciucci, carri, muli, traiene
s'anno consumatu a la via re Furmucuso p' purtà robba a la
via r'Andretta, quanti canti, quanti suoni, quanta jasteme,
quanti figli sò nati allato a nu pignone.
Penzanno, uardanno re murrecene, stè pprete accovete una a
una me recurdava na cosa ca me riciia na femmena :" Na
mamma campa ciento figli, ma ciento figli nun campano na
mamma".
Sta terra, Furmucuso, pe l'andrettisi è stata cuma na mamma,
ha sfamato tanta generaziuni e na mamma si nun simu capaci re
la venerà almeno nu l'avimo fa cummigliuà re munnezza.
